Category: Armen Press

Իսլամական հեղափոխության առաջնորդ այաթոլլա Ալի Խամենեիի մահվանից հետո Իրանում անցումային շրջանի պատասխանատվությունը կստանձնեն երկրի նախագահ Մասուդ Փեզեշքիանը, դատական իշխանության ղեկավար Գոլամխոսեյն Մոխսենի-Էջեին ու Սահմանադրության պահապանների խորհրդի իրավաբան։ «Արմենպրես»-ի հաղորդմամբ, ինչպես գրում է IRNA-ն, այս մասին հայտնել է Իրանի առաջին փոխնախագահ Մոհամմեդ Մոխբերը։

Իսրայելի ու Միացյալ Նահանգների հարվածների հետևանքով սպանվել են Իրանի պաշտպանության նախարար, գեներալ-մայոր Ազիզ Նասիրզադեն ու երկրի զինված ուժերի գլխավոր շտաբի պետ, գեներալ-լեյտենանտ Աբդոլռահիմ Մուսավին։ «Արմենպրես»-ի հաղորդմամբ` այս մասին գրում է IRNA-ն։

Իրանի շուրջ և Մերձավոր Արևելքում զարգացումներով պայմանավորված՝ Երևանի «Զվարթնոց» օդանավակայանից չեղարկվել են դեպի Դուբայ, Աբու Դաբի, Շարժա չվերթները։
«Արմենպրես»- ի փոխանցմամբ՝ այս մասին հայտնի է դառնում օդանավակայնի կայքում հրապարակված տեղեկատվությունից։
Չեղարկվել են նաև Դուբայից, Աբու Դաբիից, Շարժայից և Դոհայից դեպի Երևան նախատեսված չվերթները։

«Չինական կազմակերպությունների Իրանի ֆեդարացիան» սկսել է գրանցել Իրանում գտնվող Չինաստանի քաղաքացիներին, որպեսզի նրանց տարհանի հարևան երկրների տարածքով։ «Արմենպրես»-ի փոխանցմամբ՝ այս մասին հաղորդում են չինական լրատվամիջոցները։
Ֆեդերացիայի նախագահ Թան Քայը Global Times պարբերականին հայտնել է, որ Իրանում է գտնվում Չինաստանի ավելի քան 200 քաղաքացի։ Իրանին ԱՄՆ-ի և Իսրայելի հարվածների ֆոնին կազմակերպությունը տարհանման նախապատրաստական ​​​​աշխատանքներ է իրականացնում Չինաստանի դեսպանատան հրահանգով։
Դեսպանատան հայտարարության մեջ ասվում է, որ Հայաստանի, Ադրբեջանի և Թուրքիայի հետ ցամաքային սահմանները բաց են ինքնուրույն մեկնել ցանկացող անձանց համար։
The Associated Press գործակալությունը հաղորդում է, որ Իսրայելում Չինաստանի դեսպանատունը քաղաքացիներին խորհուրդ է տվել հեռանալ Թել Ավիվի, Հայֆայի և Երուսաղեմի կենտրոններից, ինչպես նաև օդանավակայանների, էլեկտրակայանների և նմանատիպ վայրերի հարակից տարածքներից և տեղափոխվել անվտանգ վայրեր։ Դեսպանությունը նշել է, որ մարտի 1-ից կսկսի գրանցել այն քաղաքացիներին, որոնք ցանկանում են տարհանվել Եգիպտոս և դա չեն կարող անել ինքնուրույն։

Հարգանքի տուրք՝ 2008 թ. մարտի 1-ի զոհերի հիշատակին

Առավոտյան Դուբայում ուժգին պայթյուններ են լսվել։ Այս մասին հաղորդում է Reuters գործակալությունը՝ վկայակոչելով ականատեսների։
Իրանն ավելի վաղ հաղորդել էր, որ Իսրայելի և ԱՄՆ-ի հարվածների պատճառով պատասխան հարվածներ կհասցնի նաև տարածաշրջանի երկրներում ամերիկյան ռազմակայաններին։
Իր հերթին BBC-ն, հղում անելով Արաբական Միացյալ Էմիրությունների իշխանություններին, հաղորդում է, որ Դուբայի օդանավակայանում միջադեպի հետևանքով 4 մարդ է վիրավորվել։ Թե կոնկրետ ինչ միջադեպ է տեղի ունեցել, չի նշվում, սակայն հաղորդվում է, որ վիրավորներին բժշկական օգնություն է ցուցաբերվել։
BBC-ն նաև հաղորդում է, որ Դուբայի Ջեբել Ալի նավահանգստում, որտեղ հաճախ կանգ են առնում ամերիկյան ռազմածովային ուժերի նավերը, խոցվել է անօդաչու թռչող սարք։ ԱԹՍ-ի բեկորներն ընկել են նավամատույցի վրա՝ հրդեհի պատճառ դառնալով։ Կրակը մարվել է, տուժածներ չկան։
Ավելի վաղ մեկ այլ միջադեպ էր տեղի ունեցել Աբու Դաբիի «Զայեդ» միջազգային օդանավակայանում։ Խոցված ԱԹՍ-ի բեկորների պատճառով 1 մարդ էր զոհվել, 7-ը՝ վիրավորվել։

Իրանը հաստատել է, որ Իսլամական հեղափոխության առաջնորդ այաթոլլա Ալի Խամենեին զոհվել է ԱՄՆ-ի և Իսրայելի հարձակումների հետևանքով։ «Արմենպրես»-ի փոխանցմամբ՝ այս մասին հաղորդում է իրանական Tasnim գործակալությունը։

Իրանական անօդաչու թռչող սարքը հարված է հասցրել Դուբայի հայտնի «Բուրջ ալ Արաբ» հյուրանոցին։

⚡️Ֆրանսիայի դիմումի համաձայն՝ ՄԱԿ-ի անվտանգության խորհուրդը փետրվարի 28-ին նիստ կգումարի Իրանում և Մերձավոր Արևելքում իրավիճակի առնչությամբ։

Ամերիկայի Միացյալ Նահանգների նախագահ Դոնալդ Թրամփը կոնգրեսին տեղեկացրել է Իրանի նկատմամբ սպասվող ռազմական գործողությունների մասին։
«Արմենպրես»-ի փոխանցմամբ՝ այս մասին X-ի իր միկրոբլոգում գրել է Ներկայացուցիչների պալատի խոսնակ Մայք Ջոնսոնը։
«Այս շաբաթ «8-ի խումբը» տեղեկացվել էր այն մասին, որ ամերիկյան բանակի և ԱՄՆ քաղաքացիների անվտանգության համար Իրանում ռազմական գործողությունների անհրաժեշտություն կարող է լինել։ Այդ բանից հետո ես թարմացված տեղեկություն ստացա պետքարտուղար Ռուբիոյից և սերտ շփումներ կպահպանեմ նախագահի ու Պաշտպանության նախարարության հետ՝ այս գործողության զարգացումների վերաբերյալ»,- նշել է խոսնակը։