Category: Infocom

📣 Գաղտնալսումներից որոշակի հատվածներ մոնտաժված են, հրապարակման միակ նպատակն այն է, որ քաղաքական հարված հասցնեն «Ուժեղ Հայաստան» կուսակցությանը։ Այս մասին ՀՀ Հակակոռուպցիոն դատարանի մոտ լրագրողների հետ զրույցում ասել է «Ուժեղ Հայաստան» կուսակցության նախընտրական ցուցակում ընդգրկված իրավաբան Արթուր Դանիելյանը։
🗣 «Դա ևս մեկ անգամ ցույց է տալիս իրենց վախերով առաջնորդվելու գործելաոճը։ Իրենց թուլության մասին է խոսում այն, որ առաջին հերթին թիրախավորել են կանանց»,- հավելել է նա։ |aravot.am|

🇦🇲🇹🇷 Հայաստանի և Թուրքիայի փոխնախարարները քննարկել են երկկողմ օրակարգն ու տարածաշրջանի զարգացումները, անդրադարձել խաղաղության և համագործակցության ամրապնդման կարևորությանը։
🗞 ՀՀ փոխարտգործնախարար Վահան Կոստանյանը հարցազրույց է տվել CNN TÜRK-ին՝ նշելով, որ Հայաստանը քաղաքականապես և տեխնիկապես պատրաստ է բացել իր սահմանները Թուրքիայի հետ, սակայն գործընթացը կախված է թուրքական կողմից:

❓ Պատասխանելով հարցին՝ Կոստանյանը հայտնել է, որ ներկայում Հայաստանը լուրջ դժվարությունների չի բախվում Հորմուզի նեղուցում ստեղծված իրավիճակի պատճառով։ Այնուամենայնիվ, երկարաժամկետ հեռանկարում դա կարող է ազդեցություն ունենալ տարածաշրջանի բոլորի, այդ թվում՝ Հայաստանի և Թուրքիայի վրա. «Հետևաբար, այս համատեքստում Հայաստանի և Թուրքիայի միջև սահմանի բացումը շատ կարևոր է։ Սա կարող է զգալի ձեռքբերում լինել երկու երկրների համար և շատ կարևոր տարր կայունության համար ոչ միայն Հարավային Կովկասում, այլև ավելի լայն տարածաշրջանում»,- նշել է Կոստանյանը։

🇮🇷 Լիբանանում հրադադարով պայմանավորված՝ Հորմուզի նեղուցը բաց կլինի բոլոր առևտրային նավերի համար մինչև հրադադարի ժամկետի ավարտը։
🗣 Այս մասին «X»-ում հայտնել է Իրանի ԱԳ նախարար Աբբաս Արաղչին։

🪧 Սամվել Կարապետյանի գործով նիստին զուգահեռ ընթացող ակցիայի ընթացքում քաշքշոցը սկսվեց, երբ ոստիկանները որոշեցին բացել ճանապարհը: Քանի որ քաղաքացիները ճանապարհը չէին բացում, ոստիկանները հրելով հեռացրին նրանց այդ հատվածից։ Ապա ոստիկանները սկսեցին բերման ենթարկել քաղաքացիներին:
🚔 ՆԳՆ-ից հայտնում են, որ վարչական իրավախախտումների վերաբերյալ ՀՀ օրենսգրքի 182-րդ հոդվածով նախատեսված արարք կատարելու համար 17 անձ ձերբակալվել և տեղափոխվել է Համայնքային ոստիկանության ստորաբաժանումներ։ |azatutyun.am|

⚖️ Այսօր շարունակվում է Սամվել Կարապետյանի խափանման միջոցի քննությունը։
🪧 Դատական նիստին զուգահեռ Կարապետյանին ազատ արձակելու պահանջով բողոքի ակցիա են անում նրա աջակիցները։ Նրանք երթով շարժվում են դեպի Հակակոռուպցիոն դատարան, որտեղ ընթանում է նիստը։
👮‍♂️ Մի պահ իրավիճակը երթի մասնակիցների ու ոստիկանների միջև լարվեց, ապա հանդարտվեց։

🇦🇲🇦🇿 Հայաստանի և Ադրբեջանի խորհրդարանների նախագահներն ընդգծել են կառուցողական խորհրդարանական երկխոսության շարունակման կարևորությունը:
🤝 Սիմոնյանն ու Գաֆարովան դրական են գնահատել միջազգային կազմակերպությունների շրջանակներում խորհրդարանական պատվիրակությունների միջև շփումները, որոնք սկսվել են 2025թ. հոկտեմբերին Ժնևում կայացած նրանց հանդիպումից հետո, և պայմանավորվել են շարունակել այդ շփումները:
Լուսանկարի կենտրոնում՝ Միջխորհրդարանական միության գլխավոր քարտուղար Մարտին Չունգոնգը