Category: Infocom

📊 Վիճակագրությունը հերքում է Ավինյանի պնդումը փետրվարի 20-ի վթարների մասին։
📌 Փետրվարի 20-24-ը Երևանում արձանագրվել է 482 ճանապարհատրանսպորտային պատահար, որոնց մեջ միայն 1 տրանսպորտային միջոց եղել է ամառային անվադողերով, իսկ 8-ը՝ մաշված ձմեռային անվադողերով։ Այդ մասին, պատասխանելով ՍիվիլՆեթի հարցմանը, հայտնել են ՆԳՆ-ից։
🗣 «Միաժամանակ, նույն ժամանակահատվածում Երևանի պարեկները ստուգել են 193 տրանսպորտային միջոց, որոնցից 15-ը եղել են մաշված ձմեռային անվադողերով»։ |civilnet.am|

🇪🇺🇺🇦 «Մենք այսօր Կիևում ենք, որովհետև Ուկրաինան Եվրոպա է։ Գոյատևման այս պայքարում վտանգված է ոչ միայն Ուկրաինայի ճակատագիրը։ Սա նաև Եվրոպայի ճակատագիրն է»,- X-ում գրել է Եվրոպական հանձնաժողովի նախագահ Ուրսուլա ֆոն դեր Լայենը:
✈️ Ուկրաինայի պատերազմի երրորդ տարելիցի օրը Եվրահանձնաժողովի ղեկավար Ուրսուլա ֆոն դեր Լայենի և Եվրոպական խորհրդի նախագահ Անտոնիու Կոշտայի հետ Կիև են մեկնել Իսպանիայի վարչապետ Պեդրո Սանչեսը, Կանադայի վարչապետ Ջասթին Թրյուդոն, Շվեդիայի վարչապետ Ուլֆ Քրիսթերսոնը, Լիտվայի և Լատվիայի նախագահներ Գիտանաս Նաուսեդան և Էդգարս Ռինկևիչսը, Էստոնիայի կառավարության ղեկավար Կրիստեն Միշենը։ |1lurer.am|

⚖️ ԲԴԽ-ն դատավոր Արմինե Սաֆարյանի նկատմամբ հայտարարեց խիստ նկատողություն՝ բավարարելով ՀՀ արդարադատության նախարարության միջնորդությունը։
📑 ԲԴԽ նախագահ Արթուր Աթաբեկյանը հայտնեց՝ Երևանի ընդհանուր իրավասության քաղաքացիական դատարանի դատավոր Արմինե Սաֆարյանը, պարտավորություն ունենալով կատարել դատավորի վարքագծի կանոնները, այն չի կատարել, դատական գործն իրեն հանձնված լինելու պայմաններում 2 տարի 5 ամսվա ընթացքում միջոցներ չի ձեռնարկել գործի ընթացքը լուծելու, դատավարական գործողություններ իրականացնելու համար։ |news.am|

🇫🇷🇷🇺 Ֆրանսիայի Մարսել քաղաքում ՌԴ հյուպատոսության մոտ պայթյուն է որոտացել:
🗣 Մարսելում ՌԴ գլխավոր հյուպատոս Ստանիսլավ Օրանսկին La Marseillaise-ին ասել է, որ պայթյունը տեղի է ունեցել ժամը 08։00-ին, հյուպատոսության ներսում։ Տուժածներ չկան։
📌 ՌԴ գլխավոր հյուպատոսությունը գտնվում է Մարսելի Ամբրուազա Պարե 3 հասցեում։ Այս շրջանում են տեղակայված նաև Հայաստանի, Եգիպտոսի, Թունիսի հյուպատոսությունները: |factor.am|

🇷🇺🇹🇷 ՌԴ ԱԳ նախարար Սերգեյ Լավրովը Թուրքիայում է. Անկարայում ընթանում են նրա և Թուրքիայի ԱԳ նախարար Հաքան Ֆիդանի բանակցությունները:
🔸 ՌԴ ԱԳՆ պաշտոնական ներկայացուցիչ Մարիա Զախարովան հայտնել էր, որ ռուսական պատվիրակությունը «պետք է քննարկի միջազգային, տարածաշրջանային և երկկողմ օրակարգի հարցերի լայն շրջանակ»։
🤝 Ըստ թուրքական ԶԼՄ-ների՝ Լավրովին ընդունելու է նաև Թուրքիայի նախագահ Ռեջեփ էրդողանը, քննարկվելու են ուկրաինական պատերազմը, տարածաշրջանային խնդիրներն ու երկկողմ հարաբերությունները։
📌 Հիշեցնենք, որ ավելի վաղ Թուրքիայում էր Ուկրաինայի նախագահ Վլադիմիր Զելենսկին, այն նույն ժամանակ, երբ Սաուդյան Արաբիայում մեկնարկում էին Ուկրաինայում իրավիճակի կարգավորմանն ուղղված ռուս-ամերիկյան բանակցությունները:

🇩🇪 Գերմանիայում կայացած խորհրդարանական արտահերթ ընտրություններում հաղթած Պահպանողական կուսակցությունների դաշինքի ղեկավար Ֆրիդրիխ Մերցը որպես առաջնահերթություն նշել է ԱՄՆ-ից «իրական անկախացումը»:
🗳 Գերմանիայի 69-ամյա նոր կանցլերին կոալիցիա ձևավորելու համար բարդ և երկար բանակցություններ են սպասվում. ամենաշատ ձայները ստացել է ընդդիմադիր Պահպանողական կուսակցությունների դաշինքը՝ Քրիստոնեա-դեմոկրատներն ու Քրիստոնեա-սոցիալական միություն, երկրորդ տեղում է ծայրահեղ աջերի «Այլընտրանք Գերմանիայի համար» (AfD) կուսակցությունը, որը պատմական ռեկորդ է գրանցել՝ ստանալով ձայների մոտ 20%-ը: Կանցլեր Օլաֆ Շոլցի սոցիալ-դեմոկրատները տասնամյակների ընթացքում ամենավատ արդյունքն են գրանցել՝ նախնական տվյալներով հավաքելով ձայների 16,4%:
🇺🇸 Մերցը քննադատել է Թրամփին՝ նշելով, որ նրա վարչակազմը ցույց է տվել, որ «մեծապես անտարբեր է Եվրոպայի ճակատագրի նկատմամբ»: Չնայած այս քննադատություններին՝ Թրամփը ողջունել է ընտրությունների արդյունքները: |azatutyun.am|

ԱՊՊԱ և ամառային անվադողերով անձնական մեքենաներ. Ավինյանը նշեց՝ ով է մեղավոր հինգշաբթի օրվա տրանսպորտային կոլապսի համար
🚙 «Խցանումների առաջացման պատճառների երևի թե ուղիղ 80 տոկոսը պայմանավորված էր ամառային անվադողերով ավտոմեքենաների ԱՊՊԱ-ների հետևանքով:
🔸 Մյուս խնդիրը ԱՊՊԱ համակարագի տրամաբանությունն է… Այս համակարգը Երևանի համար աղետ է: Ամեն իրար թեթև քսած ավտոմեքենաները ժամերով ամբողջ երթևեկությունը կանգնեցնում են: Դա ստեղծել է խնդիր նաև մեր տեխնիկայի համար, որը հենց այդ կարևոր ժամերին պետք է հասներ համապատասխան վայրեր՝ հա, ու ավազ ցանելու»,- ասաց Երևանի քաղաքապետ Տիգրան Ավինյանը:
✅ Ավինյանը շնորհակալություն հայտնեց գործընկերներին, Պարեկային, փրկարար ծառայություններին և այլոց՝ կատարած աշխատանքների համար, և հանձնարարեց շարունակել աշխատանքները մայթերի և բակերի մաքրման առումով, քանի որ, ըստ նրա, «առաջնային և երկրորդային փողոցներում էական խնդիր չունեն»:

Մտքի կենտրոնները Հայաստանում․ ազդեցությունը որոշումների կայացման վրա և խնդիրները
🔸 Մտքի կենտրոնների առաջացումն աշխարհում ու Հայաստանում,
🔸 կառավարության հետ կապն ու վերլուծությունների ազդեցությունը որոշումների կայացման վրա,
🔸 մարդկային ռեսուրսն ու ֆինանսական մարտահրավերները։
«Գիտություն և տեխնոլոգիա․ դիմակայելով Հայաստանի մարտահրավերներին» խորագրով համաժողովում քննարկվեցին հումանիտար ու հասարակագիտական ուղղությունների խնդիրները։

🇺🇦 Զելենսկին հայտարարել է, որ կհամաձայներ հրաժարվել նախագահի պաշտոնից հանուն Ուկրաինայում խաղաղության։
🗣 «Կարող եմ դա փոխանակել ՆԱՏՕ-ի դիմաց»,- ասուլիսի ժամանակ պատասխանելով ABC-ի հարցին՝ ասել է Ուկրաինայի նախագահը:
📌 Վլադիմիր Զելենսկին նաև չի ընդունել, որ Ուկրաինան ԱՄՆ-ին 500 միլիարդ դոլար է պարտք այն ռազմական օգնության համար, որը Վաշինգտոնը տրամադրել է Կիևին, ինչի մասին հաճախ նշում է ԱՄՆ նախագահ Դոնալդ Թրամփը: Նա նշել է, որ դրամաշնորհները չպետք է դիտարկվեն որպես վարկեր: |azatutyun.am|

Հումանիտար և հասարակական գիտությունների միջազգայնացումը․ միջազգային ու հայկական ամսագրեր և պետական կարիքներ
🔸 Գիտության միջազգայնացում՝ միջազգային տպագրություններ ու համագործակցություններ,
🔸 հայկական ամսագրերի ինդեքսավորումը միջազգային շտեմարաններում,
🔸 սերնդափոխության և կառավարություն-գիտնականներ երկխոսության անհրաժեշտությունը։
🔸 «Գիտություն և տեխնոլոգիա․ դիմակայելով Հայաստանի մարտահրավերներին» խորագրով համաժողովում քննարկվեցին հումանիտար ու հասարակագիտական ուղղությունների խնդիրները։