Category: Armen Press

«Բարգավաճ Հայաստան» կուսակցությունը հունիսի 7-ին Հայաստանում կայանալիք խորհրդարանական ընտրությունների նախընտրական քարոզարշավի շրջանակներում այցելել է Արարատի մարզ։
Կուսակցության նախագահ Գագիկ Ծառուկյանը «Ֆեյսբուք»-ի իր էջում գրել է, որ քարոզարշավի շրջանակներում չնախատեսված կանգառ են ունեցել Արարատի մարզի Նոյակերտ գյուղում, ապա հանդիպումները շարունակվել են Ավշար, Արարատ, Սուրենավան, Այգեվան և Ոսկետափ համայնքներում։

«Մեր մոտեցումը մնում է անփոփոխ՝ լինել մարդկանց կողքին, շրջել գյուղից գյուղ, ուղիղ լսել նրանց հուզող խնդիրներն ու մտահոգությունները։

Բաց ու անկաշկանդ երկխոսության ընթացքում փորձեցինք մարդկանց հետաքրքրող, անգամ ամենացավոտ հարցերին տալ անկեղծ ու շիտակ պատասխաններ։

Գյուղացիների ցանկությունը մեկն է՝ ունենալ ամուր ու անվտանգ սահմաններ, խաղաղ աշխատել իրենց հողի վրա, ստեղծել ու արարել և վստահությամբ նայել իրենց ու իրենց երեխաների ապագային»,- գրել է Ծառուկյանը։

Հայաստանում հունիսի 7-ին կայանալիք խորհրդարանական ընտրությունների քարոզարշավը «Միասնության թևեր» կուսակցությունը սկսել է Գոշավանքից։
«Արմենպրես»-ի փոխանցմամբ՝ կուսակցության տարածած հաղորդագրության մեջ նշվում է, որ Արման Թաթոյանի ղեկավարած ուժը քարոզարշավի մեկնարկի վայրի ընտրությունը պատահական չի կատարել․

«Սա պատահական ընտրություն չէ։ Այստեղ է ապրել և ստեղծագործել Մխիթար Գոշը, մարդ, ով դարեր առաջ խոսում էր արդարության, օրենքի և մարդու արժանապատվության մասին։ Այն արժեքների, որոնց կարիքը Հայաստանն ունի նաև այսօր»,-ասված է հաղորդագրության մեջ։ 

Կից հրապարակվել է նաև տեսանյութ։

Արարատի մարզի դատախազ Վարդան Պողոսյանը սեփական դիմումի համաձայն ազատվել է աշխատանքից:
«Արմենպրես»-ին այս մասին հայտնեցին ՀՀ դատախազությունից։
Հրաժարականը, հավանաբար, կապված է Արարատի մարզի Վեդի քաղաքում 2 անչափահաս քույրերի նկատմամբ սեռական ոտնձգության դեպքի հետ։
Մայիսի 7-ին ՀՀ ներքին գործերի նախարարությունը հայտնել էր, որ Քրեական ոստիկանության գլխավոր վարչության Արարատի մարզային վարչության պետ, ոստիկանության գնդապետ Սարիբեկ Ռուստամյանն ու Համայնքային ոստիկանության Վեդիի բաժնի պետ, ոստիկանության փոխգնդապետ Արմեն Մկրտչյանն ազատվել են զբաղեցրած պաշտոններից։
Քննչական կոմիտեն էլ հայտնել էր, որ պաշտոններից ազատվել են Արարատի մարզային քննչական վարչության պետ Տիգրան Շոխոյանը և Վեդիի քննչական բաժնի պետ Լեռնիկ Վարդանյանը։
Լրատվամիջոցների տեղեկություններով՝ բոլոր այս պաշտոնանկությունները կապված են Վեդիում անչափահաս քույրերի նկատմամբ սեռական ոտնձգության դեպքի հետ։
Դեպքի առթիվ նախաձեռնվել է քրեական վարույթ, մեղադրանքներ են առաջադրվել 2 անձի, նրանք ձերբակալվել են։ Նրանց կալանավորելու միջնորդություն է ներկայացվել դատարան։

«Ուժեղ Հայաստան» դաշինքը հունիսի 7-ի խորհրդարանական ընտրությունների քարոզարշավը սկսեց Ազգային ժողովի շենքի մոտ՝ «Ուժեղ Հայաստան» կուսակցության անդամներ Նարեկ Կարապետյանի և Դավիթ Ղազինյանի ճեպազրույցով։
Նարեկ Կարապետյանն ընդգծեց, որ իշխանության գալու դեպքում իրենք այնպիսի ծրագրեր են իրականացնելու, որ մարդիկ իրենց գրպանի վրա զգան փոփոխությունները, զգան, որ իրենց կյանքի որակը փոխվել է։
«Մենք նախատեսում ենք ամսական 100-150 հազար դրամ տալ 5-ից ավելի անդամ ունեցող և ծայրահեղ աղքատ յուրաքանչյուր ընտանիքի։ Այդ գումարի 70 տոկոսը տալու են աշխարհի հարուստ հայ գործարարները, և միայն 30 տոկոսով մասնակցելու է պետությունը»,- ասաց Կարապետյանը։
Նա, դիմելով Հայաստանի ժողովրդին, կոչ արեց մասնակցել ընտրություններին և, եթե ցանկանում են փոփոխություններ, քվեարկել իրենց ուժի օգտին։
Դավիթ Ղազինյանն էլ շեշտեց՝ կասկած չունի, որ առաջիկա ընտրություններում իրենք հաջողության են հասնելու։
Նրա խոսքով՝ իրենց ուժը ներկայացրել է իրատեսական ծրագիր, պոպուլիստական խոստումներ չի տալու, ժողովրդի հետ լինելու է անկեղծ՝ ասելով միայն ճշմարտությունը։
«Մենք գնում ենք առաջ և վստահ ենք, որ ունենալու ենք ուժեղ Հայաստան»,- ասաց Ղազինյանը։

Իտալիայում ընթացող «Sardinia World Chess Festival 2026» շախմատի միջազգային մրցաշարի ավարտին մնացել է երեք խաղափուլ:
6-րդ խաղափուլից հետո մրցաշարի առաջատարներ հայ գրոսմայստեր Հայկ Մարտիրոսյանը, ռուս գրոսմայստեր Յան Նեպոմնյաշչին, ամերիկացի գրոսմայստեր Բրենդոն Ջեյքոբսոնը, գերմանացի գրոսմայստեր Ֆրեդերիկ Սվանեն և ուզբեկ միջազգային վարպետ Մուխամմադզոխիդ Սույարովն ունեն 5 միավոր:
Առաջատարների շարքում է նաև հայ գրոսմայստեր Էմին Օհանյանը, ով ունի 4.5 միավոր:
Գրոսմայստեր Մամիկոն Ղարիբյանն ունի 4 միավոր, իսկ ՖԻԴԵ-ի վարպետ Սարգիս Մանուկյանը՝ 3.5 միավոր:

«Ժողովրդավարական համախմբում» կուսակցությունը 2026 թվականի խորհրդարանական ընտրությունների նախընտրական քարոզարշավը սկսել է Տավուշի մարզից։ «Արմենպրես»-ի հաղորդմամբ՝ կուսակցության հիմնադիր նախագահ Սուրեն Պետրոսյանն այս մասին հայտարարել է իր «Ֆեյսբուք»-ում հրապարակված տեսանյութում։

«Ինչպես գիտեք, այսօր քարոզարշավի առաջին օրն է, և մենք այն սկսելու ենք մեզ համար շատ կարևոր, շատ խորհրդանշական և շատ սիրելի Տավուշից, մասնավորապես Իջևանի Սուրբ Ամենափրկիչ եկեղեցուց, այնուհետև առաջին այցը կլինի Ոսկեպար։ Եվ այդպես մարզում կշրջենք և հնարավորինս կլուսաբանենք մեր նախընտրական քարոզարշավը»,- ասել է Պետրոսյանը։

Մայիսի 8-ին մեկնարկել է հունիսի 7-ին Հայաստանում կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։

Հայաստանի բժշկական կենտրոնների տնօրենները վերջին օրերին հաղորդագրություններ են ստանում ՀՀ առողջապահության նախարարի խոսնակ Մարիամ Ծատրյանի անունից, որոնք, պարզվում է, կեղծ են։
«Արմենպրես»-ի թղթակցի հետ զրույցում Մարիամ Ծատրյանը մանրամասնեց՝ նման գործողությունների հեղինակներն այդկերպ փորձում են բժշկական գաղտնիքների մասին տեղեկություններ հավաքագրել։
Խոսնակն ընդգծեց՝ միտում է տեսնում, որ այս ամենը վտանգավոր գործընթացի կվերածվի։

«Երևանյան երկխոսություն» միջազգային համաժողովի շրջանակներում անցկացվել է «Մեդիա գրագիտությունից մինչև կոգնիտիվ անվտանգություն․ արդյոք ժողովրդավարությունը բավականաչափ հարմարվողական է ժամանակակից սպառնալիքներին դիմակայելու համար» խորագրով պանելային քննարկում:
Քննարկումը վարել է Ֆրանսիայի «Տեղեկատվության և ժողովրդավարության ֆորումի» գործադիր տնօրեն Կամիլ Գրենյեն (Ֆրանսիա): Որպես բանախոսներ հանդես են եկել ՀՀ արտաքին գործերի նախարարության մամուլի խոսնակ Անի Բադալյանը, «CyberHUB-Armenia»-ի թվային սպառնալիքների վերլուծաբան Արթուր Պապյանը (Հայաստան), «Հանրային շահերի լրատվամիջոցների միջազգային հիմնադրամի» (IFPIM) քաղաքականության և էկոհամակարգերի զարգացման գծով տնօրեն Պիերիկ Ժյուդոն (Ֆրանսիա) և «International IDEA»-ի Եվրոպայի հարցերով տնօրեն Սամուել Վան դեր Ստաակը (Բելգիա):
Քննարկման ընթացքում անդրադարձ է կատարվել ժամանակակից տեղեկատվական միջավայրի փոխակերպմանը, ապատեղեկատվության և տեղեկատվական մանիպուլյացիաների դրսևորումներին՝ միտված ժողովրդավարական գործընթացների նկատմամբ հանրության շրջանում վստահության թուլացմանը:
Մասնակիցներն անդրադարձել են այն հարցին, թե ինչպես են արհեստական բանականությունը, թվային հարթակները և տվյալների վրա հիմնված տեխնոլոգիաները վերափոխում տեղեկատվության հետ փոխգործակցությունը և ազդում հանրային դիսկուրսի վրա:
Քննարկման ընթացքում ընդգծվել է անկախ ԶԼՄ-ների խթանման, ժողովրդավարական դիմակայունության շարունակական ամրապնդման և այդ ուղղությամբ համախոհ գործընկերությունների հետևողական զարգացման կարևորությունը:
Հայաստանի ԱԳՆ մամուլի խոսնակ Անի Բադալյանը ներկայացրել է այս հարցերում որդեգրված մոտեցումները, հասարակական կազմակերրպությունների և միջազգային գործընկերների հետ ձևավորված համագործակցությունը:

Խորվաթիայի արտաքին գործերի և եվրոպական գործերի նախարարության Եվրոպայի հարցերով պետքարտուղար Անդրեյա Մետելկո-Զգոմբիչը Հայաստանի ու Խորվաթիայի միջև ռազմավարական երկխոսության վերաբերյալ համատեղ հռչակագրի ստորագրումը երկկողմ հարաբերություններում կարևորագույն իրադարձություն է համարում։ Նա վստահ է, որ հռչակագիրը երկու երկրների միջև հարաբերությունները կբարձրացնի համագործակցության նոր մակարդակի մի շարք ոլորտներում։
Այս մասին Անդրեյա Մետելկո-Զգոմբիչը նշել է «Երևանյան երկխոսություն 2026» միջազգային համաժողովի շրջաններում «Արմենպրես»-ի թղթակցի հետ հարցազրույցում։

Հայաստանում մեկնարկել է 2026 թվականի հունիսի 7-ին կայանալիք խորհրդարանական ընտրությունների քարոզարշավը։
Ընտրություններին մասնակցելու համար Կենտրոնական ընտրական հանձնաժողովը գրանցել է 19 քաղաքական ուժի։