Category: Armen Press

«Քաղաքացիական պայմանագիր» խմբակցության ղեկավար Հայկ Կոնջորյանն ապրիլի 30-ին Ազգային ժողովում հանդիպել է Հայաստանում Իրանի Իսլամական Հանրապետության արտակարգ եւ լիազոր դեսպան Խալիլ Շիրղոլամի հետ:
Ինչպես «Արմենպրես»-ը տեղեկանում է ՀՀ ԱԺ-ի տարածած հաղորդագրությունից, զրուցակիցները կարեւորել են տարածաշրջանում երկարաժամկետ եւ կայուն խաղաղության հաստատմանն ուղղված ջանքերը:

Հայաստանի վարչապետ Նիկոլ Փաշինյանը կարծում է, որ Հայաստանը պետք է իր չափով ֆինանսական ներդրում ունենա Խաղաղության խորհրդի աշխատանքներում, որի հիմնադիր անդամ է։
Վարչապետ Նիկոլ Փաշինյանն այդ մասին ասել է Կառավարության նիստի ավարտից հետո լրագրողների հետ ճեպազրույցի ժամանակ։
Վարչապետը վստահեցրել է, որ Խաղաղության խորհրդում Հայաստանը ֆինանսական ոչ մի պարտավորություն չունի, կա կամավորության սկզբունք։

«Ֆինանսական ոչ մի պարտավորություն չկա կա կամավորություն, և ես կարծում եմ, որ Հայաստանի Հանրապետությունը պետք է դուրս գա «աղքատ ազգականի» կարգավիճակից, որ գնում է բոլոր տեղերում և վիզը ծուռ անկյունում կանգնած է։ Մենք պետք է մեր չափով ներդրում ունենանք։ Ոչ մի պարտավորություն Հայաստանը չունի, բայց ես կարծում եմ, որ մենք պետք է մասնակցություն ունենանք և մենք կունենանք մասնակցություն»,- ասել է վարչապետը։

Հայաստանի և Ադրբեջանի կառավարությունները բանակցությունների ընթացքում չեն քննարկում տեղահանված հայերի և ադրբեջանցիների փոխադարձ վերադարձի հարցը:
«Արմենպրես»-ի փոխանցմամբ՝ այս մասին Փաշինյանը հայտնեց ՀՀ կառավարության նիստից հետո տեղի ունեցած ճեպազրույցում:
«Ադրբեջանցիների վերադարձի հարց չենք քննարկել և չենք քննարկում, նաև չենք քննարկում Ղարաբաղի հայերի, Բաքվի հայերի վերադարձի հարց, մնացած տեղերի հայերի վերադարձի հարց: Երկու ուղղությամբ էլ քննարկումներն ունեն պրովոկատիվ ազդեցություն ընթացիկ քաղաքական իրավիճակի վրա և մեկը մյուսին թեժացնում են»,- ասաց Փաշինյանը:
Վարչապետը հավելեց՝ երկու հարցերն էլ քաղաքական օրակարգում թեժ են պահում նույն ուժերը:
«Սկզբից մի հարցն են սկսում էսկալացնել, բավարար էֆեկտ չի լինում, մյուս հարցն են էսկալացնում: Դա էժան քաղաքական շահարկում է, ոչ ավելին: Օրինակ՝ Կալուգացի օլիգարխը համոզված եմ, որ չի հասկանում ինչի մասին է խոսում, իրեն հանձնարարում են, ասում է»,- նշեց Նիկոլ Փաշինյանը՝ նկատի ունենալով «Ուժեղ Հայաստան» կուսակցության նախագահ, գործարար Սամվել Կարապետյանին:

Հայաստանի վարչապետ Նիկոլ Փաշինյանն անթույլատրելի է համարում իր մասնակցությամբ որևէ միջոցառման ընթացքում որևէ պաշտոնյայի կողմից վարչական ռեսուրսի կիրառումը:
Այս մասին Փաշինյանը հայտնեց ՀՀ կառավարության նիստից հետո տեղի ունեցած ճեպազրույցում՝ անդրադառնալով շրջանառվող խոսակցություններին, թե իր մասնակցությամբ միջոցառումներին վարչական ռեսուրսի կիրառմամբ մարդիկ են բերվում:
«Իմ մասնակցությամբ որևէ միջոցառման, եթե որևէ պետական պաշտոնյա օգտագործի վարչական ռեսուրս, առանց քննարկման ես այդ պաշտոնյային աշխատանքից հեռացնելու եմ: Եթե որևէ պաշտոնյա, վարչական ռեսուրսին ենթարկվելով, գա այդ միջոցառումներին, ես այդ եկած պաշտոնյաներին էլ առանց քննարկման աշխատանքից ազատելու եմ»,- ասաց Փաշինյանը:
Վարչապետը նշեց՝ բոլոր մարդիկ իրավունք ունեն օրենքով սահմանված կարգով մասնակցել միջոցառումների, և պատիժը կգործի նաև վարչական ռեսուրսի կիրառմամբ որևէ մեկին որևէ միջոցառման մասնակցելն արգելելու դեպքում:

Հայաստանի կառավարությունն Ադրբեջանում անազատության մեջ պահվող հայերի վերադարձի ուղղությամբ կատարում է ամենօրյա աշխատանք:
«Արմենպրես»-ի փոխանցմամբ՝ այս մասին Փաշինյանը հայտնեց ՀՀ կառավարության նիստից հետո տեղի ունեցած ճեպազրույցում:
«Ե՞րբ կլինեն արդյունքներ, երբ որ կլինեն, կտեսնենք: Ինչո՞ւ եմ այսպես ասում, ոչ թե նրա համար, որ ինչ-որ ինֆորմացիա ունեմ, որը չեմ ուզում կիսել, այլ իմ փորձը ցույց է տալիս՝ մինչև որևէ մեկը սահմանը չի հատել և չի հայտնվել Հայաստանի տարածքում, ազդարարել նման հնարավորության մասին, առնվազն լուրջ չէ»,- ասաց վարչապետը:
Ադրբեջանը շարունակում է ապօրինի անազատության մեջ պահել 19 հայերի, որոնց թվում են նաև Լեռնային Ղարաբաղի նախկին ռազմաքաղաքական ղեկավարության ներկայացուցիչները։ Նրանք կեղծ մեղադրանքներով դատապարտվել են տարբեր ժամկետներով ազատազրկումների։

Հայաստանի վարչապետ Նիկոլ Փաշինյանը պատմական է համարում Հայաստանի և Ադրբեջանի փոխվարչապետներ Մհեր Գրիգորյանի և Շահին Մուստաֆաևի փոխայցերը երկու երկրներ:
Այս մասին Փաշինյանը հայտնեց ՀՀ կառավարության նիստից հետո տեղի ունեցած ճեպազրույցում՝ անդրադառնալով Ադրբեջանի փոխվարչապետ Շահին Մուստաֆաևի՝ ՀՀ կատարած այցին:
«Շատ կարևոր իրադարձություն է տեղի ունեցել, համարում եմ երկու երկրների փոխվարչապետների այցերը պատմական խաղաղության գործընթացի ինստիտուցիոնալության տրամաբանության մեջ: Ես շատ ուրախ եմ, որ եկել ենք այս հանգրվանին»,- ասաց Փաշինյանը:
Նիկոլ Փաշինյանն ընդգծեց, որ պետք է շարունակաբար լավարկվեն Հայաստանի և Ադրբեջանի հարաբերությունները, խաղաղությունը գնալով ուժեղանա:
«Պետք է հաստատվեն բնականոն հարաբերություններ, երկարաժամկետում՝ ռազմավարական առումով, բարիդրացիական հարաբերություններ»,- նշեց վարչապետը:

ՀՀ վարչապետի ճեպազրույցը
https://www.youtube.com/live/KuAW14qaEn0?si=_2WHJOA2ARUHRTlp

Հայաստանում սպասվում է ոչ սառը, բայց տեղումնառատ մայիս. Գագիկ Սուրենյան
Հայաստանի Հանրապետության ամբողջ տարածքում մայիս ամիսը կլինի ոչ սառը, բայց տեղումնառատ։ «Արմենպրես»-ի հաղորդմամբ՝ այս մասին «Ֆեյսբուք»-ի իր էջում հրապարակած տեսանյութում հայտարարել է «Հիդրոօդերևութաբանության և մոնիթորինգի կենտրոն»-ի տնօրենի տեղակալ Գագիկ Սուրենյանը:
«Հանրապետության ամբողջ տարածքում մայիսին ամսական միջին ջերմաստիճանը կլինի կլիմայական նորմայի սահմաններում, տեղումների քանակը նորմայից ավելին, այսինքն՝ սպասվում է ոչ սառը, բայց տեղումնառատ մայիս։
Ուզում եմ հիշեցնել, որ մայիսը հանրապետության տարածքում տարվա ընթացքում ամենախոնավ ամիսն է։ Տեղումները մայիսին հիմնականում դիտվում են երեկոյան ժամերին և գիշերը։ Ի տարբերություն ապրիլ ամսվա՝ զգալիորեն կկրճատվեն ցուրտ օդային հոսանքների ներթափանցման դեպքերը, օդի ջերմաստիճանը և՛ գիշերային, և՛ ցերեկային ժամերին կլինի մոտ 5-6 աստիճանով ավելի բարձր, քան ապրիլին»,- նշել է նա։
Սուրենյանի խոսքով՝ մայիսին առավելագույն ջերմաստիճանն Արարատյան դաշտում և Երևանում կանխատեսվում է +30 աստիճան, որը կդիտվի մայիսի երրորդ տասնօրյակում։
https://www.youtube.com/watch?v=fZzAIk7lSl8

Կառավարությունը հավանություն է տրվել «Խաղաղության խորհրդի կանոնադրությունը վավերացնելու մասին» օրենքի նախագծին
Նախագծով առաջարկվում է վավերացնել Խաղաղության խորհրդի կանոնադրությունը, իսկ օրենքի ընդունման դեպքում այն ուժի մեջ կմտնի պաշտոնական հրապարակմանը հաջորդող օրվանից։
Ըստ հիմնավորման՝ Խաղաղության խորհրդի կանոնադրությունը Հայաստանի Հանրապետության կողմից ստորագրվել է 2026 թվականի հունվարի 22-ին։ Կանոնադրությունը ստորագրել են նաև մի շարք այլ պետություններ, այդ թվում՝ Ամերիկայի Միացյալ Նահանգները, Արգենտինան, Ադրբեջանը, Հունգարիան, Ղազախստանը, Կատարն ու Թուրքիան։
Նշվում է, որ Խաղաղության խորհուրդը միջազգային կազմակերպություն է, որի հիմնական նպատակը հակամարտություններից տուժած տարածքներում կայունության խթանումն ու խաղաղության ապահովումն է։ Կազմակերպությունը նախատեսում է մշակել և տարածել խաղաղության հաստատման լավագույն փորձը՝ միջազգային իրավունքի շրջանակում։
Ֆինանսների նախարարության գնահատմամբ՝ կանոնադրությամբ նախատեսվում են նաև ֆինանսական պարտավորություններ Հայաստանի համար, ինչը կարող է հանգեցնել պետական բյուջեի ծախսերի ավելացման։
Միաժամանակ, Արդարադատության նախարարությունը հայտնել է, որ փաստաթուղթը չի հակասում գործող օրենսդրությանը և ենթակա է վավերացման՝ Սահմանադրությամբ սահմանված կարգով։
Տարածքային կառավարման և ենթակառուցվածքների նախարարության տվյալներով՝ կանոնադրությամբ Հայաստանի համար գույքային պարտավորություններ նախատեսող դրույթներ չկան։
Հաշվի առնելով վերոգրյալը՝ Արտաքին գործերի նախարարությունը նպատակահարմար է համարել կանոնադրության վավերացումը Ազգային ժողովի կողմից։

Ֆրանսիայի նախագահ Էմանուել Մակրոնը Հայաստան կատարելիք պետական այցի շրջանակներում կայցելի նաև Գյումրի։ 
«Արմենպրես»-ի փոխանցմամբ՝ Գյումրիի Վարդանանց հրապարակում  մայիսի 5-ին նախատեսված է մեծ համերգ՝ նվիրված Հայաստանի և Ֆրանսիայի բարեկամությանը և մշակութային համագործակցության խորացմանը:
Համերգային ծրագրում կհնչեն հայկական և ֆրանսիական թեմատիկ երգեր, որոնք կներկայացնեն հայ և ֆրանսիացի անվանի արտիստներ՝ Հայաստանի պետական սիմֆոնիկ նվագախումբի նվագակցությամբ։