Category: Infocom

🪧 Անհետ կորածների հարազատներն այսօր բողոքի ակցիա են իրականացրել կառավարության մոտ՝ պահանջելով միջազգային ատյաններից հետ չկանչել դատական հայցերը։

🗣 «Մենք կառավարությանը չենք տվել լիազորություն՝ թշնամիներին հաճոյանալու համար նման որոշումներ կայացնելու. մեզ նորից ձեռնունայն են թողնելու։ Դեռ 2020 թվականից Բաքվում մնացած գերիներ ունենք, նոր գերիներ էլ ունենք։ Միջպետական հայցերից հրաժարվում են, մեզ ի՞նչ երաշխիք են տալու, մեր իրավունքներն ինչպե՞ս են պաշտպանելու. մենք չունենք այս հարցերի պատասխանները», – բողոքի ակցիայի ժամանակ ասել է անհետ կորածի հարազատ Տաթևիկ Սոհոյանը։ |news.am|

💵 ԱՆԻՖ-ի Մոսկվայի մասնաճյուղը 5 տարում 6,9 մլն դոլար է ստացել. «ձախողում ու խայտառակությու՞ն», թե՞ «ռեյդերային զավթում» |hetq.am|
🔸 ԱՆԻՖ-ի մոսկովյան ներկայացուցչությունը 2020-2024 թթ. ընթացքում 2,7 մլրդ դրամի (կամ 6,9 մլն դոլար) հատկացում է ստացել ԱՆԻՖ-ից, սակայն վերջինիս ներկա ղեկավարությունը չունի որեւէ տվյալ մասնաճյուղի կողմից իրականացված ծրագրերի մասին: ԱՆԻՖ-ում տեղյակ են միայն մի ծրագրից, որն անավարտ է մնացել:

❓ Հարց է ծագում. ինչու՞ է պետական ընկերությունը նման հսկայածավալ միջոցներ ուղղել իր մոսկովյան մասնաճյուղին, որը, ինչպես կարող ենք եզրակացնել ԱՆԻՖ-ի այսօրվա ղեկավարության տրամադրած ինֆորմացիայից, անպիտան կառույց է եղել:
🗣 Այդուհանդերձ, ԱՆԻՖ-ի նախկին փոխտնօրեն, ինչպես նաեւ Մոսկվայի ներկայացուցչության ղեկավար Սերգեյ Գրիգորյանը պնդում է, որ պետական ընկերության ներկա ղեկավարության տեղեկատվությունը չի համապատասխանում իրականությանը, քանի որ մասնաճյուղը տարբեր ծրագրերում էր ներգրավված ու արդյունք է ցույց տվել: Նա նաեւ նշում է, որ ԱՆԻՖ-ը «ռեյդերային զավթման» արդյունքում քանդել են «ոչ պրոֆեսիոնալ եւ ոչ կոմպետենտ» անձինք:

🇪🇺 ԵՄ-ն ողջունում է Հայաստանի ջանքերը, որը ճանապարհ է հարթում տեքստի վերջնականացման համար․ ԵՄ հայտարարությունը՝ ՀՀ-Ադրբեջան խաղաղության պայմանագրի շուրջ բանակցությունների ավարտի մասին
🔸 «Մենք բարձր ենք գնահատում երկու կողմերին վերջին մի քանի տարիների ընթացքում այս ուղղությամբ իրենց համառ աշխատանքի համար՝ ինչպես երկկողմ, այնպես էլ միջազգային հանրության ներգրավմամբ։
🔸 ԵՄ-ն լիովին աջակցում է Հայաստան-Ադրբեջան հարաբերությունների կարգավորման գործընթացին և պատրաստ է տրամադրել լրացուցիչ աջակցություն ու փորձաքննություն, եթե կողմերը դիմեն դրա համար», – նշված է ԵՄ արտաքին գործերի և անվտանգության քաղաքականության հարցերով բարձր ներկայացուցիչ, Եվրահանձնաժողովի փոխնախագահ Կայա Կալլասի հայտարարության մեջ։ |factor.am|

🪧 ՄԱԿ-ի երևանյան գրասենյակի դիմաց ակցիա է տեղի ունենում․ քաղաքացիները կառույցից պահանջում են այցելել Բաքվում պահվող հայերին, մասնակցել «դատավարություններին»։
🗣 Ակցիայի ընթացքում «Ապրելու երկիր» կուսակցության համահիմնադիր Մեսրոպ Առաքելյանը նշեց, որ այս ընթացքում թեև կար որոշակի թերահավատություն, որ միջազգային հանրությունը առանց իշխանությունների գործողությունների հայ ժողովրդին ականջալուր չի լինի, սակայն այս ընթացքում միջազգային հանրությունը որոշակի քայլեր ձեռնարկեց՝ սկսած ՄԱԿ-ի մարդու իրավունքների գլխավոր հանձնակատարի հայտարարությունից մինչև Եվրախորհրդարանի երեկ ընդունած բանաձևը:
📣 Առաքելյանն ընդգծեց՝ ՄԱԿ-ի կառույցներից պահանջում են հայ գերիների առողջական վիճակի և բռնությունների վերաբերյալ հստակ գնահատականներ տալ և գործողություններ կիրառել Ադրբեջանի նկատմամբ, ներկա գտնվել կեղծ դատավարությանը, քանի որ դրանց վերաբերյալ տեղեկատվություն ստացվում է բացառապես Ադրբեջանի պետական քարոզչամեքենայից, եւ չկա այլ տեղեկատվություն, թե գերիներն ու վկաները ինչ ցուցմունքներ են տալիս: |tert.am|
📸 Լուսանկարը՝ Civilnet-ի

📣 Տրանսպորտի ուղեվարձը չվճարողների համար տուգանքի օրինագիծ է ներկայացվել հանրային քննարկման:
💰 Ըստ նախագծի՝ Երևանում ավտոբուսների, տրոլեյբուսների կամ մետրոպոլիտենի ծառայություններից առանց վճարելու կամ վճարման կրիչը վավերացնելու օգտվելու դեպքում ուղևորները կենթարկվեն տուգանքի 15 000 դրամի չափով։ Արտոնություն ունեցող անձի փոխարեն այլ անձի երթևեկելու դեպքում տուգանքը կկազմի 18 000 դրամ։
⏳ Նշվում է, որ ուղևորները պարտավոր են տրանսպորտային միջոց նստելուց անմիջապես հետո, բայց ոչ ուշ, քան մեկ րոպեի ընթացքում վավերացնել տեղական վճարի վճարման կրիչը և մինչև ուղևորության ավարտը պահպանել իրենց մոտ: Վավերացված կրիչը և տեղական վճարի վճարման նկատմամբ հսկողություն իրականացնող անձանց պահանջի դեպքում պետք է տրամադրեն այն՝ ստուգելու նպատակով:
💬 Երևանի քաղաքապետի խոսնակ Հայկ Կոստանյանը նշեց, որ կարող են որոշակի փոփոխություններ լինել, մինչ նախագիծը կքննարկվի ԱԺ-ում: |civilnet.am|

❓ «Ի՞նչ է զիջել Ադրբեջանը համաձայնեցված համաձայնագրին հասնելու համար»,- ՀՀ ԱԳ նախարարին հարցրեց ԱԺ «Հայաստան» խմբակցության պատգամավոր Քրիստինե Վարդանյանը, որին ի պատասխան՝ Միրզոյանն ասաց, որ տեքստում նշված է, որ կողմերը ճանաչում են միմյանց տարածքային ամբողջականությունը՝ 1991թ. Ալմա-Աթայի հռչակագրի հիման վրա:
🗣 Նա կոչ արեց ընդդիմությանը, որ նրանք որոշեն, թե որ կողմի զիջումն է սա, ինքը սա համարում է «էական ձեռքբերում»:
❓ Վարդանյանը դարձյալ հարցրեց. «Ո՞ր պահանջն է, որ սկսել եք բանակցել, և այդ պահանջը դուրս է եկել»:
💬 Միրզոյանը պատասխանեց, որ պետությունների մասին խոսելիս ճիշտ չի համարում չափել պահանջների քանակով՝ հավելելով, որ դա էլ իր տեղն ունի. «Առաջարկում եմ՝ ուրիշ բանի վրա կենտրոնանալ. հենց էս տեքստով խաղաղության հաստատմամբ Հայաստանը դուրս է գալու մի մեծ և խոր, երկարամյա ճահճից, որից դուրս չգալու պարագայում ընկղմվելու ենք և թաղվենք»:

📣 ՀՀԿ-ն պահանջում է անհապաղ հրապարակել համաձայնագրի վերջնական տեքստը:
🔸 «Հայաստանի և Ադրբեջանի միջև պայմանագրի շուրջ այսպես կոչված բանակցությունների ավարտի, իսկ իրականում՝ օրվա կառավարիչների կողմից միակողմանի հակապետական զիջողականության արդյունք կրկնակապիտուլյացիայի առնչությամբ ՀՀԿ-ն հայտարարում է, որ
📍 Նիկոլ Փաշինյանը չունի մանդատ և լեգիտիմություն հայ ժողովրդի անունից նման պայմանագրեր ստորագրելու,…
📍 անթույլատրելի է համարում ՀՀ գործող Սահմանադրության՝ արտաքին ճնշման տակ իրականացվող փոփոխությունը, որը հարցականի տակ է դնելու Հայաստանի երրորդ Հանրապետության պատմությունն ու գոյությունը,
📍 վերահաստատում է, որ միջազգային դատարաններում հայցերից հրաժարումը ադրբեջանական հերթական ուլտիմատումի հնազանդ կատարում է,
📍 ընդգծում է ԵԱՀԿ Մինսկի խմբի լուծարման կենսական վտանգավորությունը…»,- ասվում է ՀՀԿ գործադիր մարմնի հայտարարությունում:

‼️ ՀՀ կառավարության ղեկավարը չունի միջազգային ատյաններից Ադրբեջանի դեմ Հայաստանի գանգատներից հրաժարվելու կամ այդպիսի որոշումների վրա ազդելու լիազորություն: Նա այդ հայտարարություններն անում է ՔՊ ղեկավարի իր նեղ շահերի գերակայությամբ՝ ի չարը գործադրելով ՀՀ վարչապետի կարգավիճակը:
🔸 Կառավարության ներկայիս ղեկավարը չունի ՀՀ քաղաքացիներին և Հայոց սփյուռքին իրենց իրավունքների՝ պատմական նշանակության զանգվածային խախտումների համար պաշտպանության հնարավորությունից զրկելու իրավասություն: Կառավարության ղեկավարը չունի հարյուր հազարավոր մարդկանց խախտված իրավունքների վերականգնմանն ուղղված միջազգային դատական գործընթացները կանգնեցնելու իրավունք:
🔸 Բացի այն, որ կա իրավական արգելք, նման համազգային նշանակության հարցերի լուծմանը մասնակցությունը պահանջում է բարձր հանրային վստահություն կամ աջակցություն: Ակնհայտ է, որ ՔՊ ղեկավարը չունի նման վստահություն կամ աջակցություն, հետևաբար՝ նա չունի նման իրավունք:
[ՀՀ նախկին ՄԻՊ Արման Թաթոյան]

🇦🇲🇪🇺 Համաձայնագրի ստորագրումից հետո ԵՄ քաղաքացիական առաքելության հետ համագործակցության մասով ընդունելի, փոխշահավետ լուծումների կգանք. Արարատ Միրզոյան
🗣 «ԵՄ դիտորդական առաքելության տեղակայմանը խստորեն ընդդիմացող և դրանից դժգոհող և այժմ առաքելությանը չափազանց հոգատար վերաբերվող և կարևորող մեր գործընկերներին (ընդդիմությանը՝ խմբ.) ուզում եմ վստահեցնել, որ երբ այս համաձայնագիրը կստորագրվի, կվավերացվի և ուժի մեջ կմտնի, մենք մեր ԵՄ գործընկերների հետ քաղաքացիական առաքելության հետ համագործակցության մասով ընդունելի, փոխշահավետ լուծումների կգանք»,- ԱԺ-ում ասաց ԱԳ նախարար Արարատ Միրզոյանը:
💬 ԱԺ «Հայաստան» խմբակցության պատգամավոր Քրիստինե Վարդանյանն արձագանքեց, որ ընդդիմությունը ընդդիմանում է և շարունակելու է ընդդիմանալ Ադրբեջանի բոլոր պայմանները կատարելու իշխանության «մարմաջին». «Հայաստանում դուք բերել եք ԵՄ դիտորդներին, բնականաբար դեմ ենք, որ Ադրբեջանի պահանջով առանց քննարկելու հանում եք նրանց սահմանից: Դա է ընդդիմության խնդիրը»:

🇦🇲🇦🇿 Համաձայնեցված համաձայնագրի տեքստում չկա`
🔸 որևէ դրույթ այսպես կոչված միջանցքի մասին,
🔸 այն մասին, որ մինչև Խորհրդային միության փլուզումը 2 երկրների տարածքներում բնակեցված և հետո այդ տարածքները լքած մարդիկ պետք է վերադառնան իրենց տները կամ այն տարածքները, որտեղ իրենց նախնիները ապրել են,
🔸 ՀՀ սահմանադրության մասին որևէ կարգավորում:
🗣 Այս մասին ՀՀ ԱԺ արտաքին հարաբերությունների մշտական հանձնաժողովի հերթական նիստի ժամանակ ասաց ՀՀ ԱԳ նախարար Արարատ Միրզոյանը՝ ընդգծելով, որ «ընդհանրապես որևէ միակողմանի կարգավորում չկա»: