Category: Hetq

«Եթե ցանկանում ես հաղթել ընտրություններում, ապա պետք է անես այն բոլոր քայլերը, որոնք արգելված են Ընտրական օրենսգրքով». Լիպարիտ Դրմեյան
«Միասնության թևեր» կուսակցության ներկայացուցիչ Լիպարիտ Դրմեյանը  Սահմանադրական դատարանում հանդես եկավ եզրափակիչ խոսքով: Նա անդրադարձավ «Քաղաքացիական պայմանագիր» կուսակցության նախընտրական ծախսերին: 📌 Նշեց, որ իշխող կուսակցությունն ամբողջությամբ չի հայտարարագրել ծախսերը, հակառակ դեպքում այն գերազանցելու էր օրենքով նախատեսված առավելագույն չափը և ունենալու էր իրավական հետևանքներ:
Ըստ Լիպարիտ Դրմեյանի՝ եթե ամեն ինչ հայտարարագրվեր, ապա Կենտրոնական ընտրական հանձնաժողովի դիմումի հիման վրա պետք է Վարչական դատարանը ՔՊ-ի գրանցումն անվավեր ճանաչեր: Մինչդեռ պատշաճ հսկողություն չի իրականացվել:
🫶 Լ. Դրմեյանն անդրադարձավ նաև «սրտիկով» կապույտ ավտոմեքենաներին:
🔗Մանրամասները` ԱՅՍՏԵՂ

«Ընտրողների 21%-ը, լսելով տարածված ձայնագրությունները, իրենց ձայնը չեն տվել ընդդիմադիր հայացքներ ունեցող ուժերին». Արամ Վարդևանյան
Սահմանադրական դատարանում ավարտին է մոտենում 7 քաղաքական ուժերի կողմից ներկայացված դիմումի հիման վրա գործի քննությունը: Այն վերաբերում է 2026թ. հունիսի 7-ի Ազգային ժողովի հերթական ընտրությունների արդյունքներն ամփոփելու վերաբերյալ Կենտրոնական ընտրական հանձնաժողովի թիվ 259-Ա որոշմանը: Այսօր՝ 2026թ. հուլիսի 1-ին, դատաքննության վերջին փուլն է: 6 օր տևած քննությունից հետո կողմերը հանդես են գալիս եզրափակիչ ելույթներով: ՍԴ-ն այսօր կավարտի գործի քննությունը և կհեռանա խորհրդակցական սենյակ՝ հուլիսի 4-ին որոշումը հրապարակելու նպատակով:
🗣️ «Ուժեղ Հայաստան» կուսակցությունների դաշինքի ներկայացուցիչ Արամ Վարդևանյանն իր ելույթում նշեց, որ ընտրությունների ժամանակ տեղի են ունեցել համակարգային, զանգվածային, պարբերական բնույթ կրող ընտրախախտումներ:
🔗Մանրամասները` ԱՅՍՏԵՂ

❕ԿԳՄՍ նախարարի տեղակալի պաշտոններից ազատվել են Դանիել Դանիելյանը և Հասմիկ Ավագյանը: Որոշումները ստորագրել է վարչապետ Նիկոլ Փաշինյանը:
✅ ԿԳՄՍ նախարարի տեղակալ է նշանակվել Տիգրան Վիրաբյանը:

8-րդ հարկ. հանցավոր ծագման 523 հազար ֆրանկ է փոխանցվել Հայաստան
2026 թ․-ի փետրվարին  շվեյցարական UBS բանկից Հայաստան է փոխանցվել հանցավոր ծագում ունեցող 523 հազար շվեյցարական ֆրանկ։ Գումարը պատկանել է ռուսաստանցի գործարար Դենիս Կացիվին։ Նա կապ է ունեցել «Մագնիտսկու գործ» անունը ստացած խմբի հետ, որոնք հանցավոր ճանապարհով ձեռք բերած 230 միլիոն դոլարը հանել են Ռուսաստանից և փորձել են օրինականացնել։ 
📌 2026 թ․-ի հունիսին «Հետքում» հրապարակվել է ««Մագնիտսկու գործի» հետքերով. կասկածելի կես միլիոն ֆրանկը Շվեյցարիայից հասել է Հայաստան»վերնագրով հետաքննությունը։ Հեղինակը «Հետքի» գլխավոր խմբագիր Էդիկ Բաղդասարյանն է, ով «8-րդ հարկ» փոդքասթի ժամանակ ներկայացնում է գործարքի մանրամասները և անդրադառնում է Հայաստանի ֆինանսաբանկային համակարգի ստվերային կողմերին։

🇳🇱🇲🇦 Նիդերլանդների հավաքականը լքեց պայքարը, իսկ Մարոկկոն գնում է 1/8 եզրափակիչ
Մարոկկոյի ֆուտբոլի ազգային հավաքականը դուրս եկավ Աշխարհի 2026 թ․ առաջնության 1/8 եզրափակիչ: Մեքսիկայի Մոնտերեյ քաղաքի «Էստադիո Մոնտերեյ» մարզադաշտում կայացած հանդիպման հիմնական և լրացուցիչ ժամանակն ավարտվեց 1:1 հաշվով, ինչից հետո մարոկկացիները հետխաղյա 11-մետրանոց հարվածաշարում 3:2 հաշվով առավելության հասան Նիդերլանդների ընտրանու նկատմամբ:
🇧🇷🇯🇵 Բրազիլիայի հավաքականը կամային հաղթանակ տարավ Ճապոնիայի նկատմամբ ու դուրս եկավ ⅛ եզրափակիչ
Ֆուտբոլի աշխարհի առաջնության 1/16 եզրափակչում Բրազիլիայի հավաքականը ԱՄՆ-ի Հյուսթոն քաղաքում 2:1 հաշվով հաղթեց Ճապոնիայի հավաքականին և դուրս եկավ ⅛ եզրափակիչ։
Աշխարհի հնգակի չեմպիոն Բրազիլիայի հավաքականը հաջորդ փուլում կհանդիպի Կոտ դ’Իվուար — Նորվեգիա հանդիպման հաղթողին։ Այս թիմերի հանդիպումը տեղին կունենա հունիսի 30-ին՝ ժամը 21:00-ին։
🇵🇾🇩🇪 Պարագվայի հավաքականը դուրս թողեց Գերմանիային Աշխարհի առաջնությունից
Աշխարհի 2026 թվականի առաջնության 1/16 եզրափակչում Պարագվայի հավաքականը հետխաղյա 11-մետրանոց հարվածաշարում 4-3 հաշվով պարտության մատնեց Գերմանիայի ընտրանուն ու աշխարհի քառակի չեմպիոնին պայքարից դուրս թողեց։
Աշխարհի քառակի չեմպիոն Գերմանիայի հավաքականը լքում է Աշխարհի առաջնությունը, իսկ Պարագվայը հաջորդ փուլում կհանդիպի Ֆրանսիա — Շվեդիա զույգի հաղթողին:

❗️Թուրքիայի և Ադրբեջանի արտաքին գործերի նախարարությունները դատապարտել են Իսրայելի կառավարության որոշումը՝ ճանաչելու 20-րդ դարի սկզբին Օսմանյան կայսրությունում հայերի նկատմամբ իրականացված զանգվածային սպանությունները որպես ցեղասպանություն։
Թուրքիայի արտաքին գործերի նախարարության հայտարարության համաձայն՝ Իսրայելի կառավարության որոշումը «քաղաքական դրդապատճառներ ունի» և նպատակ ունի «քողարկելու Գազայի հատվածում իրականացվող ցեղասպանությունը»։
🇹🇷Թուրքական արտաքին քաղաքական գերատեսչությունը նշել է, որ Իսրայելը Գազայում պաղեստինցիների դեմ իրականացվող գործողությունների համար կանգնել է Միջազգային քրեական դատարանի քննության առջև ու «1915 թվականի իրադարձությունների վերաբերյալ քաղաքական որոշում ընդունելով՝ փորձում է թաքցնել սեփական հանցագործությունները»։
🇦🇿Իր հերթին Ադրբեջանի արտաքին գործերի նախարարությունը հայտարարել է, որ լուրջ մտահոգությամբ է ընդունել Իսրայելի կառավարության այս որոշումը, որը վերաբերում է, ինչպես նշված է հայտարարության մեջ, «այսպես կոչված Հայոց ցեղասպանությանը»։

🏠 18 տարի սպասում է իր բնակարանին․ Կոնդի բնակչուհու փոխհատուցման չլուծված պատմությունը 
Նարինե Հովհաննիսյանը արդեն 18 տարի է՝ սպասում է իր բնակարանի դիմաց խոստացված փոխհատուցմանը։ Երևանի կենտրոնում՝ Կոնդ թաղամասում գտնվող Ռուսթավելի փողոցի նրա 37 քմ մակերեսով բնակարանը 2008 թվականին ճանաչվել է գերակա հանրային շահ և օտարվել։ Շենքը, որից որպես փոխհատուցում բնակարան պետք է տրվեր Ն. Հովհաննիսյանին, կառուցվել է 2018 թ.-ին։ Սակայն մինչ օրս Կոնդ թաղամասի բազմաբնակարան շենքի 6-րդ  հարկի բնակարանի դիմաց համարժեք փոխհատուցում չի ստացել։ 
Կառավարության 2007 թ. մարտի 1-ի որոշմամբ՝ Կոնդ թաղամասում գտնվող բացառիկ գերակա հանրային շահ ճանաչված գույքերի ձեռքբերող է ճանաչվել «Դաունթաուն Երևան» ՓԲԸ-ն: Կառավարության որոշման հիման վրա ընկերությունը 37 քմ մակերեսով բնակարանի սեփականատերերի հետ 2008 թ. դեկտեմբերի 4-ին կնքել է հասարակության և պետության կարիքների համար սեփականության օտարման պայմանագիր։ Ընկերությունը պարտավորվել է օտարված գույքի դիմաց պայմանագրի գնի 59 մլն 748 հազ. դրամի փոխարեն նույն թաղամասում կառուցվող բազմաբնակարան շենքում սեփականատերերին, որպես սեփականություն տրամադրել բնակարան:
🔗Մանրամասները` ԱՅՍՏԵՂ

Թեմա համար 1․ ռուսական սահմանափակումներն ու Եվրոպա արտահանման հեռանկարները
Հայաստանում սկսվել է բերքահավաքի շրջանը։ Գյուղացին տարվա աշխատանքը հավաքել է, պիտի վաճառի, բայց չգիտի՝ ինչպես ու որտեղ։ Հայկական գյուղմթերքի զգալի մասն արտահանվում էր Ռուսաստան, ինչը պայմանավորված է թե՛ աշխարհագրական դիրքով, թե՛ ԵԱՏՄ-ին Հայաստանի անդամակցությամբ։ Բայց արդեն քանի ամիս է՝ հայկական մի շարք ապրանքատեսակների վրա ՌԴ իշխանությունները  սահմանափակումներ են դրել։ Արդյունքում՝ ապրանքի մի մասը սպառվում է ներքին շուկայում, մի մասը  փչանում է, քանի որ չեն հասցնում իրացնել, իսկ մյուսի համար արտադրողներն ու արտահանողները փորձում են նոր շուկաներ գտնել։
📌 «Թեմա համար 1»-ի այս թողարկմանը կփորձենք հասկանալ՝ ինչ խնդրի առաջ է հայ արտադրողը, ինչ լուծումներ են առաջարկվում, ու որքանով է իրատեսական նոր շուկաներում հաստատվելու հեռանկարը:

🇦🇲🇪🇺 Հայաստանում ԵՄ առաքելությունը հայկական և հատկապես օտարերկրյա տեղեկատվական հարթակներում երբեմն ներկայացվում է որպես լրտեսական խումբ, Հայաստանի վրա ազդեցության գործիք և այլն։ Առաքելության ներկայությունից հատկապես դժգոհ են Բաքվում։ Ներկայացնում ենք, թե ինչով է զբաղված առաքելությունը։
❔Ի՞նչ նպատակ ունի
Առաքելության հիմնական խնդիրներն են՝
Հայկական կողմից դիտարկել Հայաստան-Ադրբեջան սահմանին տիրող իրավիճակը։ 
Նպաստել մարդկանց անվտանգությանը հակամարտության ազդակիր ՀՀ տարածքներում։
Սատարել Հայաստանի ու Ադրբեջանի միջև վստահության մթնոլորտի ձևավորմանը։
❔Ե՞րբ է սկսել աշխատանքը
Առաքելությունը ստեղծվել է ԵՄ արտաքին հարաբերությունների հարցերով խորհրդի որոշմամբ 2023 թ. հունվարի 23-ին: Աշխատանքները մեկնարկել է 2023 թ. փետրվարի 20-ին: Նույն օրը Եղեգնաձորում պաշտոնապես բացվել է ԵՄ առաքելության գլխավոր շտաբը և տեղակայվել նախնական գործառնական ներուժը։ 
Առաքելության տեղակայումից առաջ՝ 2022 թ. հոկտեմբերի 20-ից մինչև դեկտեմբերի 19-ը Հայաստանում գործել են ԵՄ դիտորդները։ Առաքելության մանդատի ժամկետը 2 տարի է, որը կարող է վերանայվել: Սրա հիման վրա 2025 թ. հունվարին ԵՄ-ն ևս երկու տարով երկարաձգել է առաքելության մանդատի ժամկետը՝ մինչև 2027 թվականի փետրվարի 19-ը։
❔Որտե՞ղ է տեղակայված
Առաքելության գլխավոր շտաբը Եղեգնաձորում է, կապի գրասենյակը Երևանում։ Առաքելությունը ունի 6 գործառնական բազաներ՝ Եղեգնաձորում, Ջերմուկում, Մարտունիում, Կապանում, Գորիսում և Իջևանում։ Առաքելությունը տեղակայված է միայն հայկական կողմում։ Առաքելության երկրորդ մանդատի ժամկետում նախատեսված է 166 միջազգային և 59 տեղացի աշխատակցի ներգարվում: ԵՄ առաքելության ներկա ղեկավարը Սատու Կոյվուն է։

Դատավորները հակադարձում են՝ փաստացի դատավորի ծանրաբեռնվածությունը չի նվազել, պարզեցված գործերը փոխարինվել են բարդ գործերով
2026թ․–ի վեց ամիսներին Բարձրագույն դատական խորհուրդը (ԲԴԽ) դատավորների նկատմամբ հարուցված 8 կարգապահական վարույթ է քննել, որոնց հիմքում 2024-2025 թվականներին քննված գործերն են։
🔻Վարույթներից 7–ը հարուցել է արդարադատության նախարար Սրբուհի Գալյանը, մեկը՝  Դատավորների ընդհանուր ժողովի էթիկայի և կարգապահական հարցերի հանձնաժողովը։
Կարգապահական 8 վարույթներից 4–ը հարուցվել են գործերի քննության ողջամիտ ժամկետները խախտելու հիմքով։ Տպավորություն է ստեղծվում, որ արդարադատության նախարարը դատարանների ծանրաբեռնվածությունը նվազեցնելու նպատակով իրականացված բարեփոխումների ազդեցությունը ստուգում է դատավորների նկատմամբ կարգապահական վարույթներ հարուցելով։
🔻Մենք նույնպես հետաքրքված ենք, թե օրենսդրական փոփոխություններն ինչ ազդեցություն ունեցան դատարանների ծանրաբեռնվածությունը նվազեցնելու վրա։ Վերջին տարիներին «Հետաքննող լրագրողներ» կազմակերպությունը մի քանի հետազոտություն է իրականացրել և տարբեր հարթակներում  հետևողականորեն բարձրացրել է գործերի քննության ողջամիտ ժամկետները չպահպանելու, դատարանների գերծանրաբեռնվածությունը նվազեցնելու հարցերը։ Մեր ուսումնասիրությունները պարզեցին, որ դատարանների ծանրաբեռնվածությունը նվազեցնելու նպատակով ներդրված գործիքակազմերը էականորեն չեն նպաստել գործերի քննության արագությանը։
❗️Վերջին երեք տարիներին մեզ չի հաջողվել պաշտոնական գրությամբ դատարանից տեղեկատվություն ստանալ, թե գործիքակազմերը ներդնելուց հետո, ըստ էության, դատավորների վարույթում տարեկան քանի գործ է քննվում կամ քանի տոկոսով է նվազել դատարանների ծանրաբեռնվածությունը։ 
🔗Մանրամասները՝ ԱՅՍՏԵՂ