Category: Hetq

Բիզնես, քաղաքականություն և անձնական թշնամանք. Փաշինյան-Ծառուկյան հակամարտության նոր փուլը
Վարչապետ Նիկոլ Փաշինյանի և խոշոր գործարար Գագիկ Ծառուկյանի  հարաբերությունները վաղուց դուրս են եկել սովորական քաղաքական բանավեճի շրջանակներից՝ վերածվելով անձնական ու  քաղաքական գոյատևման պայքարի։ 
2026թ. հուլիսի 6-ին ձերբակալվեց գործարար, «Բարգավաճ Հայաստան» կուսակցության նախագահ Գագիկ Ծառուկյանը։ Ձերբակալությանը նախորդել էին ժամեր տևած խուզարկությունները Ծառուկյանի առանձնատանն ու նրա հետ փոխկապակցված 70-ից ավելի հասցեներում։
Հաջորդ օրը՝ հուլիսի 7-ին Երևանի առաջին ատյանի ընդհանուր իրավասության դատարանը Ծառուկյանին 2 ամսով կալանավորելու որոշում կայացրեց։ Գագիկ Ծառուկյանը մեղադրվում է առանձնապես խոշոր չափերով խարդախության և առանձնապես խոշոր չափերով փողերի լվացման մեջ:
Ըստ Քննչական կոմիտեի, Գագիկ Ծառուկյանը և մի քանի իրանցի գործարարներ համատեղ հիմնել են ընկերություններ՝ իրավաբանական անձինք։ Ապա Իրանից Հայաստան են ներկրել 52 միավոր տրանսպորտային միջոց, տեխնիկա, վառելիք և տարբեր տեսակի ապրանքներ։

«Ներկրումները քողարկելով տնտեսական գործունեություն ծավալելու ձևական դրսևորումներով, կեղծել են ներմուծման մաքսային հայտարարագրերը և պաշտոնական այլ փաստաթղթեր, նախապես առաջացած դիտավորությամբ հափշտակել են ընդհանուր 21 մլն 72 հզր 827 ԱՄՆ դոլարին համարժեք շուրջ 8 մլրդ 126 մլն 946 հզր 460 ՀՀ դրամ արժողության գույքերը»

,- ասված է Քննչական կոմիտեի հաղորդագրության մեջ։
Գլխավոր դատախազությունը կասկածելի է համարում Գագիկ Ծառուկյանին պատկանող մի շարք գույքերի ձեռք բերման օրինականությունը։ 2023 թվականինց Ծառուկյանի ու ընտանիքի անդամների՝ կնոջ, ծնողների, որդիների, հարսի գույքն ուսումնասիրվում է Գլխավոր դատախազության ապօրինի ծագում ունեցող գույքի բռնագանձման գործերով վարչությունում:
📌ԲՀԿ առաջնորդի նկատմամբ քրեական վարույթի նախաձեռնումը և կալանավորումը նրա թիմակիցները և ընդդիմադիր մի շարք ուժեր համարում են քաղաքական հետապնդում ու ընդդիմախոսներին ճնշելու հերթական փորձ։
🔗Ավելին՝ ԱՅՍՏԵՂ

Փաշինյանի հետ վիճած Արփինե Սողոյանին ծանուցել են՝ սեպտեմբերից աշխատանքային պայմանագիրը լուծվելու է
2026թ. մայիսի 18-ին նախընտրական քարոզարշավի ժամանակ վարչապետ Նիկոլ Փաշինյանը վիճաբանության մեջ էր մտել քաղաքացի Արփինե Սողոյանի հետ, ով նրան մեղադրել էր հայրենիքը գողանալու մեջ։ Միջադեպի ժամանակ վարչապետը վրդովվել էր. 

«Եթե դուք Ռոբն եք, ձեզ կզացնելու եմ։ Էդ Ղարաբաղի ակցենտով դիմակավորվածներ կան, որ վիդեոներ են տարածում։ Դուք եք փախած լակոտները, հանեք ձեր դիմակները, այ ստահակներ, այ փախածներ, այ մեր երեխեքին հակառակորդի առաջ մենակ թողածներ։ Ռոբի լակոտներ, Սերժի լակոտներ, Գագոյի լակոտներ…»

,- ասել էր Փաշինյանը։ 
Արփինե Սողոյանն անհետ կորած Հրանտ Պապիկյանի քույրն է և «Սրբազան պայքար»-ի գործով պաշտպան Տաթևիկ Սողոյանի մայրը։ Նա մանկաբարձ-գինեկոլոգ է, որպես կանանց կոնսուլտացիայի բաժնի վարիչ աշխատում է «Քանաքեռ-Զեյթուն» առողջության կենտրոնում։ 📌 21 տարվա աշխատանքից հետո այսօր նրան ծանուցել են՝ սեպտեմբերի 14-ից աշխատանքային պայմանագիրը լուծվելու է։
🔻Միջադեպից հետո տեղեկություններ կային, որ Արփինե Սողոյանին պատրաստվում են աշխատանքից հեռացնել, սակայն Երևանի քաղաքապետ Տիգրան Ավինյանը վստահեցրել էր՝ բացառվում է, որ որևէ մարդ իր քաղաքական հայացքների համար ազատվի աշխատանքից։

«Մանավանդ, որ խոսքը գնում է կնոջ մասին, ով եղբորն է կորցրել և իր էմոցիան կարող է արտահայտել այսկերպ կամ այնկերպ»

,- ասել էր Տիգրան Ավինյանը: 

‼️ Փրկարար ծառայությունը հաղորդում է, որ հուլիսի 13-ին՝ ժամը 15։40-ին, 112 օպերատիվ կառավարման կենտրոն ահազանգ է ստացվել, որ Գեղարքունիքի մարզի Չկալովկա բնակավայրի մոտակայքում տեղի է ունեցել ՃՏՊ, բախվել են «BMW» և «Toyota» մակնիշների ավտոմեքենաները։
«Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։
Պարզվել է, որ ՃՏՊ-ի հետևանքով տուժել է 6 քաղաքացի, իսկ մեկ երեխա՝ 7 ամսական, մահացել է։
Փրկարարները դեպքի վայրում իրականացրել են համապատասխան աշխատանքներ։ Հանգամանքները պարզվում են»,- նշվում է հաղորդագրության մեջ։

Կիբեռհանցագործները Telcell Wallet-ի անունից թալանում են քաղաքացիներին
Հայաստանում արձանագրվում են համակարգչային հափշտակության նոր և վտանգավոր դեպքեր։ Խարդախները, օգտագործելով քաղաքացիների վստահությունը, կեղծ գովազդների միջոցով հասանելիություն են ստանում նրանց ֆինանսական միջոցներին։
Այս մասին պաշտոնական հայտարարությամբ ահազանգում է ՆԳՆ կիբեռոստիկանությունը:
Ինչպե՞ս է գործում խարդախության սխեման
🔻Կեղծ գովազդներ սոցցանցերում. Facebook և Instagram հարթակներում «Telcell Wallet»-ի անունից տարածվում են գրավիչ գովազդներ, որոնք քաղաքացիներին խոստանում են մեկ ամիս անվճար օգտվել Երևանի հասարակական տրանսպորտից։
🔻Կեղծ հղումներ և կոդի պահանջ. Գովազդի հղումով անցնելուց հետո քաղաքացիներից պահանջվում է մուտքագրել իրենց հեռախոսահամարին ստացված SMS հաստատման կոդը։
🔻Գումարների հափշտակում. Հենց քաղաքացին տրամադրում է կոդը, հանցագործները լիարժեք հասանելիություն են ստանում նրա «Telcell Wallet» հաշվին։ Արդյունքում՝ նրանք գողանում են ինչպես դրամապանակում եղած գումարը, այնպես էլ դրան կցված բանկային քարտերի ֆինանսական միջոցները։
Ոստիկանությունը կոչ է անում ցուցաբերել առավելագույն զգոնություն և հետևել անվտանգության այս կանոններին.
❗️Մի՛ անցեք սոցիալական ցանցերում տարածվող կասկածելի հղումներով, նույնիսկ եթե դրանք ներկայացվում են հայտնի կազմակերպությունների անունից:
❗️Երբեք և ոչ մեկին մի՛ տրամադրեք SMS հաղորդագրությամբ ստացված հաստատման կոդերը, գաղտնաբառերը կամ այլ անձնական տվյալներ:
❗️«Telcell Wallet»-ի հետ կապված ցանկացած գործողություն կատարեք միայն պաշտոնական հավելվածի միջոցով:

▪️«Սուրբ Գրիգոր Լուսավորիչ» ԲԿ-ից հաղորդում են, որ հուլիս 13-ին բժշկական կենտրոն է տեղափոխվել մեկ տարեկան երեխա՝ բազմակի վնասվածքներով և սրտի կանգով:
Բժշկական կենտրոնի վերակենդանացման թիմի և համապատասխան մասնագետների կողմից անմիջապես իրականացվել են անհրաժեշտ բոլոր համալիր վերակենդանացման միջոցառումները։
Ցավոք, վնասվածքների ծանրության պատճառով երեխայի սրտի գործունեությունը վերականգնել չի հաջողվել, և արձանագրվել է կենսաբանական մահ։

Ռուս գործարարներն ուզում են Արմանիսում նոր տարածքներ ուսումնասիրել.❓ ի՞նչ ռիսկեր են տեսնում փորձագետները
«Սագամար» ՓԲԸ-ն 2026 — 2029թթ. -ին ցանկանում է երկրաբանական ուսումնասիրություններ կատարել Լոռու մարզի Արմանիսի հանքային դաշտի արևմտյան և հարավարևելյան թևերում:
«Սագամար» ՓԲԸ-ն, հիշեցնենք, ընդերքօգտագործման իրավունք ունի Արմանիսի ոսկի-բազմամետաղների հանքավայրի համար, սակայն արդեն 10 տարի է` չի շահագործում հանքավայրը:
📌Ընկերության բաժնետերերը երկու ռուս գործարարներ են` Դմիտրի Կորժևը` 29,66% և Դմիտրի Տրոիցկին` 70,34% մասնաբաժիններով:  
Արմանիսի հանքային դաշտը գտնվում է Ստեփանավան քաղաքից 1.6 կմ արևելք, Արմանիս և Ուրասար բնակավայրերից հարավ: «Սագամար» ՓԲԸ-ն երկրաբանական ուսումնասիրությունների համար հայցում է Արմանիսի հանքային դաշտի արևմտյան և հարավարևելյան թևերը: Հայցվող տեղամասերը ներառված են Լոռու մարզի Ստեփանավան խոշորացված համայնքի Ուրասար և Արմանիս բնակավայրերի վարչական սահմաններում, զբաղեցնում են համապատասխանաբար 894.98 հա և 549.84 հա մակերեսներ:
📍Հյուսիսարևմտյան թևի (Ուրասարի կողմ) տեղամասը գտնվում է Արմանիսի ոսկու հանքավայրի բացահանքից և հարստացուցիչ ֆաբրիկայից արևմուտք՝ ձգվելով դեպի Ուրասար բնակավայրի վարչական տարածք։
🔗Մանրամասները՝ ԱՅՍՏԵՂ

Թեմա համար 1. ❔ի՞նչ սպասել նոր խորհրդարանից ու ովքեր են նոր դերակատարները
Խորհրդարանական ընտրություններն ավարտվեցին, Սահմանադրական դատարանը հրապարակեց ընտրությունների արդյունքների վերաբերյալ որոշումը, իսկ իշխանությունը սկսել է արդեն պաշտոններ բաշխել թիմի ներսում։
📌 «Թեմա համար 1»-ի այս թողարկմանը կամփոփենք ընտրություններին հաջորդած իրադարձությունները։

Փաշինյանը հայցեր է ներկայացրել Էդմոն Մարուքյանի և Սոֆիա Հովսեփյանի դեմ. պահանջում է հրապարակային ներողություն, հերքում և փոխհատուցում
Հայցով պահանջվում է, որ Սոֆիա Հովսեփյանը, դատարանի վճիռն օրինական ուժի մեջ մտնելուց հետո հինգ աշխատանքային օրվա ընթացքում, hraparak.am լրատվական կայքում և ֆեյսբուքյան էջում հրապարակային ներողություն խնդրի վարչապետ Նիկոլ Փաշինյանից՝ 2026թ. հունիսի 9-ին «Այդ տականքին ես վաղուց եմ ճանաչում՝ գիտեի, թե ոնց է նկարելու թվերը» վերնագրովհրապարակված հոդվածում նրան «տականք» անվանելու համար։ 
📌 Ինչ վերաբերում է Էդմոն Մարուքյանին, ապա նա նույնպես ընտրական թեմայով է խոսել և իր ֆեյսբուքյան էջում ընտրակեղծարար է անվանել Ն. Փաշինյանին։ Վարչապետը այդ արտահայտությունը համարել է վիրավորանք։
Է. Մարուքյանի դեմ ներկայացված հայցի մանրամասները և ամբողջական պահանջը հայտնի չեն, քանի որ «Դատալեքս» տեղեկատվական համակարգում տվյալները թերի են լրացված։

🧑‍🧑‍🧒‍🧒 Աշխատանքի և սոցիալական հարցերի նախարարությունից հաղորդում են, որ ուժի մեջ է մտնում «ծնողական ժամ» կարգավորումը։
❓ Ի՞նչ է սա նշանակում։
Աշխատող ծնողները (այդ թվում՝ խնամատար ծնողը, որդեգրողը և խնամակալը) կարող են աշխատանքային օրվա ընթացքում ժամանակավորապես բացակայել՝ երեխայի խնամքի, դաստիարակության, կրթական գործընթացներին մասնակցելու կամ երեխայի շահերից բխող այլ կարևոր հարցերով զբաղվելու համար։
💡Ինչպե՞ս է գործելու նոր կարգավորումը։
Ծնողական ժամը տրամադրվում է հետևյալ ծավալով․
• մինչև 12 տարեկան 1 կամ 2 երեխա ունեցող ծնողին՝ օրական մինչև 30 րոպե,
• մինչև 12 տարեկան 3 և ավելի երեխա ունեցող ծնողին՝ օրական մինչև 1 ժամ,
• մինչև 18 տարեկան ֆունկցիոնալության ծանր կամ խորը սահմանափակում ունեցող երեխայի ծնողին՝ օրական մինչև 1 ժամ՝ անկախ երեխաների թվից։
❔Ինչպե՞ս օգտվել։
Ծնողական ժամը տրամադրվում է աշխատողի գրավոր դիմումի հիման վրա, և գործատուն չի կարող մերժել այն։
ℹ️ Կարևոր է իմանալ։
Ծնողական ժամի կիրառման ընթացքում պահպանվում է աշխատողի հիմնական աշխատավարձը, իսկ գործավարձով վարձատրվողների դեպքում՝ միջին աշխատավարձը (բացառությամբ պարգևատրման գումարների)։