Category: Armen Press

Ֆրանսիայի նախագահ Էմանուել Մակրոնը հայտարարել է, որ իր երկիրը չի մասնակցի Հորմուզի նեղուցի ապաշրջափակման գործողություններին։
Այս մասին Էմանուել Մակրոնն ասել է հանրապետության անվտանգության և պաշտպանության խորհրդի նիստում, որի օրակարգում Իրանում և Մերձավոր Արևելքում իրավիճակն է եղել։

Ոլորտային ռազմավարությունները կենսական նպատակների մասին են, իսկ ամենաբարդ պրոցեսը պետական ապարատում և ընդհանրապես ժողովրդավարական համակարգերում հենց նպատակների սահմանումն է որոշակի կոնսենսուսով։
Այդ կարծիքը Հանրային ոլորտի նորարարության 3-րդ երևանյան միջազգային համաժողովի պանելային քննարկման ժամանակ հայտնեց ՀՀ ՆԳ փոխնախարար Արմեն Ղազարյանը։

«Ունենք դեպքեր, երբ ռազմավարություններն, իսկապես մնում են թղթի վրա և լավը չեն։ Մարդիկ երբեմն ելնում են այն կանխավարկածից, որ գրել են շատ լավ ոլորտային ռազմավարություններ, համոզված են, որ թղթի վրա ամեն ինչ ճիշտ է, բայց հետո չեն կարողանում ռազմավարություններն իմպլեմենտացնել առօրյա կյանքում։ Ամենակարևոր հարցադրումն այն է, որ մեր պետական ապարատը շատ դժվարությամբ է սահմանում նպատակներ։ Շատ հաճախ ռազմավարությունները գրվում էին՝ նկարագրելով լոկ գործընթացներ, սակայն այդպես չպետք է լինի»,- ասաց Ղազարյանը։

Նրա դիտարկմամբ՝ մենք ունենք նաև բարձր մակարդակի ներքին կոնֆլիկտայնություն ցանկացած հարցի շուրջ։

Օման պաշտոնական այցի շրջանակներում մարտի 17-ին Մասկատում ՀՀ ԱԳ նախարար Արարատ Միրզոյանը հանդիպում է ունեցել Օմանի Սուլթանության ԱԳ նախարար Բադր բին Համադ բին Համուդ Ալ-Բուսաիդիի հետ:
Այս մասին հայտնել են ՀՀ արտաքին գործերի նախարարությունից՝ հավելելով, որ զրուցակիցները քննարկել են Հայաստանի և Օմանի միջև համագործակցության զարգացման հարցերի լայն շրջանակ։
Օմանի ԱԳ նախարարը բարձր է գնահատել ՀՀ ԱԳ նախարարի որոշումն այցելել Մասկատ՝ չնայած տարածաշրջանային ներկայիս բարդ իրավիճակին՝ այցը որակելով որպես պատմական։
Արարատ Միրզոյանն իր երախտագիտությունն է հայտնել այցի կազմակերպման և հատկապես ՀՀ ռեզիդենտ դեսպանության բացման հարցում ցուցաբերած պատրաստակամության և աջակցության համար՝ ընդգծելով, որ այցն արտացոլում է ՀՀ մեծ հետաքրքրությունը զարգացնել բազմաշերտ հարաբերություններ Օմանի և ընդհանուր առմամբ տարածաշրջանի երկրների հետ։
Զրուցակիցները երկուստեք ընդգծել են, որ Օմանում ռեզիդենտ դեսպանության բացման ՀՀ որոշումը կարևոր հանգրվան է երկկողմ հարաբերությունների հետագա խորացման ճանապարհին։
Հայաստանի և Օմանի միջև երկկողմ օրակարգի բովանդակային հարստացման և առկա ներուժի լիարժեք իրացման նպատակով Արարատ Միրզոյանը և Բադր բին Համադ բին Համուդ Ալ-Բուսաիդին քննարկել են փոխադարձ հետաքրքրություն ներկայացնող մի շարք ոլորտներում համագործակցության զարգացման հեռանկարները։
Հանդիպմանը նախարար Միրզոյանն իր երախտիքն է հայտնել փետրվարի 28-ից գործարկված Մասկատ-Երևան ութ ուղիղ չվերթների կազմակերպման հարցում արդյունավետ փոխգործակցության համար, որոնց միջոցով ՀՀ է վերադարձել շուրջ 550 ՀՀ քաղաքացի։
Նախարար Միրզոյանը գրառում է կատարել Օմանի ԱԳՆ պատվավոր հյուրերի մատյանում. «Ինձ համար մեծագույն պատիվ է լինել Հայաստանի Հանրապետության առաջին ԱԳ նախարարը, ով այցելել է Օմանի Սուլթանություն՝ մի երկիր, որը խորապես հավատում է դիվանագիտությանը և հանդես է գալիս որպես խաղաղության ջատագով»։

Հայաստանի վարչապետի աշխատակազմի ղեկավար, Ազգային փոքրամասնությունների հարցերով խորհրդի նախագահ Արայիկ Հարությունյանը խորհրդի անդամների հետ մարտի 17–ին այցելել է Արմավիրի մարզի ազգային փոքրամասնությունների բնակավայրեր, հանդիպել բնակիչների հետ, ծանոթացել իրականացված և ընթացիկ ծրագրերին:
Մինչ բնակավայրեր այցելելը, Արայիկ Հարությունյանն աշխատանքային հանդիպում է ունեցել Արմավիրի մարզպետ Վահրամ Խաչատրյանի հետ: Վերջինս մանրամասներ է ներկայացրել ազգային փոքրամասնությունների բնակավայրերում ճանապարհաշինության, գազիֆիկացման, ջրամատակարարման ցանցի կառուցման և այլ ուղղություններով իրականցված և ընթացքում գտնվող աշխատանքների վերաբերյալ:
Այցի շրջանակում Արայիկ Հարությունյանը հանդիպել է նաև Նոր Արտագերս, Երասխահուն, Ֆերիկ բնակավայրերի բնակիչների հետ, լսել նրանց կողմից բարձրացված հարցերը, ընդգծել, որ ազգային փոքրամասնությունների մտահոգությունները մշտապես Կառավարության ուշադրության կենտրոնում են և այցի նպատակը տեղում խնդիրներին ծանոթանալն ու հասցեական լուծումներ տալն է:
Վարչապետի աշխատակազմի ղեկավարը նաև այցելել է Ակնալիճի եզդիական «Զիարատ», շրջայց կատարել նորակառույց եզդիական հոգևոր տաճարների համալիրում, ծանոթացել իրականացված աշխատանքներին:

Հայաստանի քաղաքացիները հուլիսի 1-ից հնարավորություն կունենան արգելափակել իրենց անվամբ ցանկացած վարկի ձևակերպումը, ինչը նրանց հնարավորություն կտա խուսափել զեղծարարների ցանցում հայտնվելուց:
Այս մասին մարտի 17-ի ասուլիսում հայտարարեց ՀՀ կենտրոնական բանկի նախագահ Մարտին Գալստյանը:

«Հուլիսի 1-ից հնարավորություն ենք ստեղծելու քաղաքացիների համար, որպեսզի նրանք կարողանան փակել իրենց կողմից որևէ վարկային պրոդուկտի օգտագործումը: Բայց հետո էլ պետք է գնան բանկ, որպեսզի կարողանան ակտիվացնել դա: Այս մոտեցումը նրանց կպաշտպանի, բայց միաժամանակ կբարձրացնի ծախսերը»,- նշեց նա:

Մարտին Գալստյանը չբացառեց նաև, որ այս տարի կարող են խստացվել բանկերում քաղաքացիների նույնականացման պահանջները, որոնք, սակայն, հանգեցնելու են ավելի շատ ժամանակի և ռեսուրսների վատնման: Նա ընդգծեց, որ ցանկացած պարագայում խաբեբաներից խուսափելու լավագույն միջոցը զգոնությունը պահպանելն է:

Հայաստանի վարչապետ Նիկոլ Փաշինյանն Աշխատանքի և սոցիալական հարցերի նախարար Արսեն Թորոսյանի հետ ունեցել է աշխատանքային քննարկում, որի ընթացքում քննարկվել է սահմանամերձ բնակավայրերում 16 մլն դրամ աջակցությամբ բնակարանային ծրագիրը։
«Արմենպրես»-ի փոխանցմամբ՝ ՀՀ վարչապետի աշխատակազմից հայտնում են, որ Նիկոլ Փաշինյանը նշել է՝ այս ծրագրով Կառավարությունը ֆինանսավորելու է նոր առնվազն 1417 տան կառուցում՝ մի շարք սահմանամերձ և ոչ սահմանամերձ բնակավայրերում։
Արսեն Թորոսյանը տեղեկացրել է, որ այն նախատեսված է 3 խումբ շահառուների համար։ Առաջին խումբը մոտ 400 շահառուներն են, որոնք նախկինում չեն հասցրել օգտվել ծրագրից։ Վերջիններս այն քաղաքացիներն են, որոնք բավարարում են ծրագրի բոլոր չափանիշները և շինթույլտվությունը ստացել են մինչև 2025 թվականի մայիսի 1-ը և այն քաղաքացիները, որոնք 2024 թվականի հունվարի 1-ից մինչև 2025 թվականի մայիսի 1-ը հողամաս են ձեռք բերել կամ հողամասի սեփականության իրավունքն են գրանցել։
ՄԱՆՐԱՄԱՍՆԵՐ

Մոսկվայում Իրանի դեսպան Քազեմ Ջալալին հերքել է այն լուրերը, թե երկրի նոր գերագույն առաջնորդ Մոջթաբա Խամենեին բուժման նպատակով գտնվում է Ռուսաստանում։ «Արմենպրես»-ի փոխանցմամբ՝ այս մասին հաղորդում է ՏԱՍՍ գործակալությունը:
Քուվեյթի Al-Jarida թերթն ավելի վաղ գրել էր, թե 56-ամյա Մոջթաբա Խամենեիին, որը ենթադրաբար վիրավորում է ստացել, հանգստյան օրերին Մոսկվա են տեղափոխել բուժման նպատակով։ Կրեմլում հրաժարվել են մեկնաբանել թերթի պնդումները։

Հայաստանի տնտեսությունը չի կարող անմասն մնալ տարածաշրջանում ծավալվող մարտական գործողությունների ազդեցությունից: Իրավիճակի սրումը կարող է 1.2-1.7 տոկոսի գնաճի հանգեցնել Հայաստանում:
«Արմենպրես»-ի հաղորդմամբ՝ այս մասին մարտի 17-ի ասուլիսում հայտարարեց ՀՀ կենտրոնական բանկի նախագահ Մարտին Գալստյանը:

Իրանում ԱՄՆ-ի և Իսրայելի գրոհների հետևանքով 108 պատմական հուշարձան է վնասվել, որոնցից 60-ը՝ Թեհրանում: «Արմենպրես»-ի փոխանցմամբ՝ այս մասին հաղորդել է Իրանի մշակույթի և իսլամական կողմնորոշման նախարարությունը։

«ԱՄՆ-ի և սիոնիստական ​​ռեժիմի կողմից վերջերս իրականացված ռազմական գրոհների հետևանքով Իրանի տարբեր տարածաշրջաններում վնասված պատմական ու մշակութային հուշարձանների թիվը հասել է 108-ի: Առավել մեծ վնասները գրանցվել են Թեհրանի նահանգում. վնասվել է 60 պատմական հուշարձան: Դրան հաջորդում են Սպահանը՝ 19 օբյեկտ, և Քուրդիստանը՝ 12 օբյեկտ», — հայտարարության տեքստը մեջբերում է Tasnim գործակալությունը:

Մասկատում կայացել է Հայաստանի և Օմանի ԱԳ նախարարների հանդիպումը
ՀՀ ԱԳՆ